'O presèbbio. lyrics

So’ tant’anne, è ovèro?, eppure

pare ajere…pare ajere !

Sìazzeccavano ‘e pasture,

t’arricuorde ?, ‘e chesti ssere..

**

Chesti ssere – t’arricuorde ? –

‘o presebbio era a ccumpleto.

Ogne quatto o cinco sorde,

curre curre anzi’ a Tuleto..

**

mo p’’o bove e ll’aseniello,

mo p’’e magge o p’’e culure;

mo pe chesto e mo pe chello :

carta, sùvero, pasture..

**

Che tenévamo ? cchiù o méno

tridice anne : ‘a stéssa aità.

Dduje guagliune ! e nienteméno

già parlàvemo ‘e spusà..

**

Che ce vo’ ? – te dicév’io –

Si è accussì, che ce sta ‘e male ?

N’atu ppòco, còre mio..

Sto’ già ä tèrza ginnasiale !

**

Che paròle ‘e piccerille,

ma cómm’èrano sincère !

Vase e nzirie a mille a mille,

tutt’’e juorne e tutt’’e ssere..

**

Moncevo’, vicine ‘e casa :

rundinelle ‘e doje cuvate

nate sott’una cammasa,

deventajemo nnammurate.

**

Mo vurrìa, comm’ero allora,

turnà semplice e nnucente.

Mo vurrìa chiagnere ancora

chelli llacreme cucente !

**

Vurrìa credere comm’io

ngenuamente aggio creduto..

Ma già ncopp’’o core mio

troppa cennere ha chiuvuto.

**

Mo, ogne tanto, io tengo mente

‘stu presebbio ‘e ‘sti guagliune,

ca, cu n’aria ‘ndifferente :

“ Papà, appienne ‘sti mellune..”

**

“ Papà, acconcia ‘sta barracca..”

“ Papà, azzeccace ‘sti piere..”

E i’, cu ‘a colla e ‘a ceralacca,

faccio ‘o miedeco e ‘o ngigniere..

**

Ma se fa – comme se dice? –

pe tenè cuntente a ll’ate ;

pecchè ‘e tiempe mieje felice

chisà addò so’ sprufunnate..

**

E nun tornano.. E nun tuorne

manco tu…Chisà addò staje…

E chisà si…chilli juorne

-comm’a me- t’’e chiagne maje !!

• Artist:Eduardo Nicolardi