'O sóle 'e maggio lyrics

Maggio ! che sóle ! Maggio e che friscura!

Quanti spallère ‘e ròse int’e ciardine !

Róssa… già spónta ‘a fràvula ammatura,

so’ ghianche cómm’o llatte ‘e giesummine!

Maggio, che ciélo e che aria dóce ‘e séra;

‘a sta fenèsta mia sènto ‘e cantà…

Ammóre mo se spósa â Primmavèra,

che matremmònio e che felicità!

‘E stélle ‘nciélo, int’a sta nòtta dóce

so’ sciure d’òro… nu ricamo ‘e suónne;

una me chiamma… mo ne sènto ‘a vóce

ma chistu còre ‘a guarda e nun rispónne.

E chélla dice : “T’arricuórde sèmpe?

T’annammuraste a Maggio, tiémpo fa..”

“ Sì, m’arricurdarraggio ‘e tutt’e tiémpe,

ohi, stélla d’òro, nun me ne parlà!

Chéll’era cómm’a tte : d’òro lucènte

e abbagliava c’a luce a ttutte quante;

ma ‘ncòre annascunnéva nu serpènte..

chist’uócchie miéje se n’hanno fatto ‘e chiante!

Tu, mo, me vuò fà chiàgnere, staséra?

Chésto è succiéso tantu tiémpo fa…”

Benedicimmo sèmpe ‘a Primmavèra..

e ..Maggio, ‘o mése d’a..felicità!

• Artist:Ferdinando Russo
• Album:Le videopoesie di Gianni Caputo