من ئه‌و دیله‌م [Min Ew Dîlem] [Transliteration]

من ئه‌و دیله‌م له‌ زیندانی تاریكا

هه‌تاوی بیر ڕووناك ئه‌كا به‌ر چاوم

به‌ناو هه‌زار حه‌ڵقه‌ی داوی باریكا

قه‌فی زنجیر ئه‌پچڕێنێ هه‌نگاوم

من ئه‌و دیله‌م له‌ پشت شوورا‌ی پۆڵاوه

ئاسۆی هیوای گه‌شم هه‌رگیز ون ناكه‌م‌

به‌ گڕی سوور له‌ڕووی ئاسمان نوسراوه‌

به‌ند به‌ به‌ندی ئایین نامه‌ی بڕواكه‌م

مادام هێزی زۆربه‌ی گه‌لم له ‌پشته

دڕك گوڵه‌ و ترس ئارامه‌ بۆ خواستم

من ئه‌و دیله‌م كه‌ سرنجی بێباكم

سڵ له‌ چاوی پڕ له‌ قینی زه‌ق ناكا‌

دانه‌چیڕه‌ی گورگی هاری سه‌ر لاکم

زاتی گیانی نه‌له‌رزیوم له‌ق ناكا

من ئه‌و دیله‌م كه‌ دیل كه‌ری زۆردارم

دڵی له‌به‌ر گوڕی ناڵه‌م ئه‌له‌رزێ

تا شڕتر كا كه‌ڵبه‌ی له‌شی زامارم

خۆی خراپتر له‌ناو خوێنا ئه‌گه‌وزێ

هۆنراوە: مامۆستا گۆران

• Artist:Kale Atashi