Che foza in su ‘entu lyrics

Bolada est sa vida

che foza in su ‘entu,

a lestru est fuida,

ma restat s’ammentu.

S’ammentu ti pinghet

biadu e riende:

non paret ch’astringhet

sa sorte messende.

Messende a frullana

segadu at sos filos:

fatende bardanas

t’isperdet sos pilos

Sos pilos de oro

jumpian a palas.

No mujan su coro

sas oras prus malas.

Sun malas sas dies,

nieddas sas penas.

Sas dentes afies,

a 'émida alenas.

Alenas e patis,

ma sighis cun aju.

Su male cumbatis

apitu a s’ammaju.

S’ammaju 'e sos sonos

ti donat cossolu.

Cun cànticos bonos

non ses mai solu.

Ma solu non ses,

ca servan cun grabbu:

sufrides in tres

cun mama e cun babbu.

E babbu est incue,

cun tegus dessignat.

'Che catzat sas nues,

sa cara carignat.

Carignat s’ispera

chi 'alfat sa lua.

Sa mama, che chera

si sorvet a cua.

A cua e a sa muda

ti ses avviadu.

Su male, che Giuda

su 'asu t’at dadu.

T’an dadu sas fadas,

bint’annos ebbia:

no est in de badas

chi restas a ghia.

Che ghia lampizas

in ínnidas tancas.

A sole assimizas

ma cantu nos mancas!

Nos mancas ma como

su coro as pro domo.

Non bolat s’ammentu

che foza in su 'entu.

• Artist:Cordas et Cannas