Mario Abbate - Te sì scurdata 'e Napule

'Na sera, oje bionda, te purtaje 'stu mare

P' 'a primma vota a Napule d'està.

Stive cu mmico a prora e ll'uocchie chiare

P' 'o golfo se 'ncantavano

Pe' ddò, allummata, accumpareva Napule

E quacche voce se senteva già.

E Ammore, Ammore!

Bionda, capiste e te capette i' pure

Quanno, cu 'e mmane 'mmano,

Tu c' 'o ffrancese, i' c' 'o nnapulitano,

T'annammurate 'e Napule,

T'annammuraste 'e me.

Rrose d' 'o Munasterio 'e San Martino,

Loggia ca 'ncielo fravecata sta,

Nuje ce affacciajemo mentre a mmatutino

'E cchiese già sunavano

E nnuvole 'e calore se sperdevano,

E se scetava Napule d'èstà.

E Ammore, Ammore!

Tremmaje 'stu core tujo 'ncopp'a 'stu core.

E quanno, 'a ll'onne chiare,

Vediste 'o sole ca spuntava a mmare,

Tu te vasaste Napule,

Tu te vasaste a mme.

E comme, comme? Doppo tant'ammore

Tu t'he' pututo 'e Napule scurdà!

Tu, si e vvote parteva 'nu vapore,

Te ne facive lacreme

'Ncopp'a 'stu core e, quanno te screvevano,

Te n'aggio visto lettere 'e straccià.

E Ammore, Ammore!

'Na sera, 'e bello, i' te dicette: "E' overo

Ca te ne vaje dimane?"

Tu mme 'nfunniste 'e lacreme 'sti mmane

E abbandunaste Napule,

M'abbandunaste a mme.

• Artist:Mario Abbate