A la fontana del vergier [English translation]

A la fontana del vergier,

On l'erb' es vertz josta·l gravier,

A l'ombra d'un fust domesgier,

En aiziment de blancas flors

E de novelh chant costumier,

Trobey sola, ses companhier,

Selha que no vol mon solatz.

So fon donzelh'ab son cors belh

Filha d'un senhor de castelh!

E quant ieu cugey que l'auzelh

Li fesson joy e la verdors,

E pel dous termini novelh,

E quez entendes mon favelh,

Tost li fon sos afars camjatz.

Dels huelhs ploret josta la fon

E del cor sospiret preon.

Ihesus, dis elha, reys del mon,

Per vos mi creys ma grans dolors,

Quar vostra anta mi cofon,

Quar li mellor de tot est mon

Vos van servir, mas a vos platz.

Ab vos s'en vai lo meus amicx,

Lo belhs e·l gens e·l pros e·l ricx!

Sai m'en reman lo grans destricx,

Lo deziriers soven e·l plors.

Ay mala fos reys Lozoicx

Que fay los mans e los prezicx

Per que·l dols m'es en cor intratz

Quant ieu l'auzi desconortar,

Ves lieys vengui josta·l riu clar :

Belha, fi·m ieu, per trop plorar

Afolha cara e colors!

E no vos cal dezesperar,

Que selh qui fai lo bosc fulhar,

Vos pot donar de joy assatz.

Senher, dis elha, ben o crey

Que Deus aya de mi mercey

En l'autre segle per jassey,

Quon assatz d'autres peccadors!

Mas say mi tolh aquelha rey

Don joys mi crec! mas pauc mi tey

Que trop s'es de mi alonhatz.

• Artist:Marcabru