'A madonna d''e mannarine [Italian translation]

Quann ‘nciélo n’angiulillo

nun fa chéllo ch’ha da fa’,

‘o Signore ‘int’a na cèlla

scura scura ‘o fa nzerrà.

Po’ se vòta a n’ato e dice:

“Fa venì San Pietro ccà!”

E San Pietro cumparisce:

“Neh, Signó, che nuvità?”.

“Dint’a cèlla scura scura

n’angiulilo sta nzerrato:

miettammillo a pane e acqua

pecché ha fatto nu peccato!”.

E San Pietro acala ‘a capa

e rispónne: “Sissignóre!”

Dice Dio: “Ma statt’attiénto

ch’ha da stà vintiquatt’ore!”.

L’angiulillo, da llà dinto,

fa sentì tanta lamiénte…

“Meh, Signó – dice San Pietro -

Pe sta vòta… nun fa niénte…”.

“Nonzignóre! Accussì vòglio!

“Statte zitto! – dice Dio -

Si no ognuno se nne piglia!

‘N Paraviso cumann’io!

E San Pietro avota ‘e spalle.

Da la cella scura scura

l’angiulillo chiagne e sbatte,

dice ‘e métterse paura.

Ma ‘a Madonna, quanno ognuno

sta durmenno ‘a suónno chino,

annascuso ‘e tutte quante

va e lle pòrta ‘e mannarine.

• Artist:Ferdinando Russo
• Album:Amanapoli