AG Arsch Huh - Arsch huh, Zäng ussenander

Du määß et Fröhstöcksfernsehn ahn

Un selvsverständlich wie die Wetterkaat

Kütt unger ferner liefen,

Wo se wie vill Asylante plattjemaat.

Na klar, dä Mob hätt widder randaliert,

Dä Bürjer applaudiert:

“Die Kanaken sinn ald ömquartiert,

Die Naach hätt sich rentiert.“

Du jehß ding Brühtcher holle,

Su wie jede Morje waatste ahn dä Thek.

Do lööt ’ne Typ em Blaumann Sprüch aff,

Bei dänne ’t dir nur kotzschlääsch weed.

Du denks: Nur russ he, wat ess bloß passiert,

Dat kein Sau reajiert?

Wiesu ess e’ janz Land ahm Kusche,

Als wöhr et paralysiert?

Wie wöhr et, wenn du däm Blaumann jetz sääß,

Dat du Rassistesprüch jar nit verdrääß?

Wenn du en vüür dä Lück blamiers,

Enndäm du ’n einfach oplaufe lööß?

Un övverhaup: Wemmer selver jet däät,

Wemmer die Zäng ens ussenander kräät?

Wenn mir dä Arsch nit huhkrieje,

Ess et eines Daachs zo spät.

Wohrs du dat nit, dä singem Vatter

Nie et Stillhahle verzeihe kunnt,

Weil dä sich domohls arrangiert hätt,

Bess er schließlich vüür dä Trömmre stund?

Wie wöhr’t, wenn du ding Ideale

Langsam ens vertredden dääts?

Oder wills du em Ähnz drop waade,

Dat dat irjendeiner für dich määt?

Wie wöhr et, wemmer selver jet däät,

Wemmer die Zäng ens ussenander kräät?

Wenn mir dä Arsch nit huhkrieje,

Ess et eines Daachs zo spät.

Dä Schuhß ess fruchtbar noch,

Uss däm die Nazibrut russkroch.

Jetzt jilt et: Arsch huh, Zäng ussenander!

Jetz, nit nähxte Woch!

Wie wöhr et, wemmer selver jet däät,

Wemmer die Zäng ens ussenander kräät?

Wenn mir dä Arsch nit huhkrieje,

Ess et eines Daachs zo spät.

• Artist:AG Arsch Huh