Alrest lebe ich mir werde "Palästinalied" lyrics

Alrest lebe ich mire werde.

sit min svendig ovge siht.

daz reine lant vnde ovch die erde.

der man so vil eren giht.

es ist geschehen des ich ie bat.

ich bin komen an die stadt

da got menschlichen trat.

Schoeniv lant rich vnde here.

swaz ich der noch han gesehen.

so bist dvs ir aller ere.

was ist wunders hie geschehen.

daz ein magt ein kint gebar.

here vber aller engel schar.

was das niht ein wunder gar.

Hie lies er sich reine tovfen.

daz der mensche reine si.

do lies er sich hie verkovfen

daz wir eigen wurden fri.

anders weren wir verlonrn

wol dir sper kriuce vnde dorn.

wie dir ze den ist din zorn.

Do er sich wolte vber vns erbarmen.

do leit er den grimmen tot.

er vil rich vber vns vil armen

daz wir komen vs der not.

daz in do des niht verdros

dast ein wunder alzegros

aller wunder vber genos.

In das lant hat er gesprochen.

einen angeslichen tac.

da der weise wirt gerochen.

vnde diu witwe klagen mag.

vnde der arme den gewalt.

den man hat mit in gestalt.

wol im dort der hie vergalt.

Kristen iuden vnde die heiden

iehent daz dis ir erbe si.

got mvesse es zerehte scheiden.

dur die sine namen dri.

aldiu welt stritet her.

wir sin an der rehten ger.

reht ist daz er vns gewer.

• Artist:Walther von der Vogelweide
• Album:Codex Manesse