Cejna Oktoberê lyrics

Di welatê Qeyseran, tam çel û sê sal berê

Gûr bû bi destê Lenîn şoreşa Oktoberê

Mîna pêlê deryayê rêncber, pale, cefakêş

Di destan ala Marks, Lenînê mezin li pêş

Ajotin ser kele û bedenê ji hezar sal

Bi çakûç û dasên xwe dengê topan kirin lal

Ew kozikên ji pola bi dû hev hilweşiyan

Ser cendekê xwînmêjan gurûhê gel meşiyan

Ji destê zadegana gelê dîl giş aza bûn

Bi vê cejnê rêncberê cîhanê hemî şa bûn

Bi tîrêja Oktober gelek welat çirisîn

Ji rojava,rohelat,hetanî Kûrya û Pekîn

Di dojeha Qeyseran bi rastî çêbû buhuşt

Hêv, stêrê renge sor bi ezman re gihîşt

Di bablîska Otom û di van salê hêvên sor

Fîrewnek ji nav mûmya serê xwe rakir ji gor

Mîna bav û kalê xwe, wî jî da ser rêya xwîn

Di sînga Misr û Sûrye ve kir sed hezar birîn

Azadîxwazê welat ev bûne sê zibistan

Avêtiye zindanê Fîrewnê axirzeman

Destê pak kelem çêkir, serê aza bi mîr kir

Serencema Hîtler û Musûlînî ji bîr kir

Emê îro pîrozkin ji nav dîwarê stûr,

Cejna Oktobera xwe, xelas nêzîke ne dûr.

Zîndana Mezê, 7.11.1960

• Artist:Qedrîcan