Chélla ca lle piacévano 'e cunfiétte. lyrics

Chélla che lle piacévano ‘e cunfiette

e rusecava sèmpe cannelline,(1)

e tenéva ‘e capille accussì fine

ca s’aveva appuntà tutt’e mmatine

cu nu mazzo ‘e ferriétte...(2)

nun l’aggiu vista cchiù...

Aggiu ‘ncuntrato ‘a róssa, mmaretata,

ricca e smargiassa ‘ncòpp’ ô bagarino,

c‘e ppèrne â récchia e càrreca ‘e lazziétte,

cuntenta e amata,

suddisfatta ‘e tenè ll’òmmo vicino,

ch’essa aveva aspettato pe destino

tutta na giuventù...

Chélla che lle piacevano ‘e cunfiétte

nun l’aggiu vista cchiù...

Aggiu ‘ncuntrato, cu na piccerélla,

p’a mano, cómme a essa, malatélla,

‘a biónda. Ch’ i’ tremmavo ca muréva!

Ca se n’ avètt’a j’ ‘ncopp’ Arenèlla (3)

pe via c’a séra lle venéva ‘a frèva...

Ca me dicéva: Lassame...

c’ aspiétte?

E tenéva na tósse, ‘a puverèlla,

ma nun vuléva manco nu sciusciù(4).

Chélla che lle piacévano ‘e cunfiétte

nun l’aggiu vista cchiù.

Aggiu ‘ncuntrato tutte ’e nnammurate!

‘E cchiù luntane, ‘e cchiù luntane e antiche...

‘E ccanuscènze vècchie,’e bbòne amiche

a una a una tutte ‘aggiu ‘ncuntrate...

Chélla che me faceva cchiù dispiétte,

chélla che me purtaje sèmpe p’e viche (5),

chélla che me trattaje c’o scemanfù...(6)

Chélla che lle piacévano ‘e cunfiétte

nun l’ aggiu vista cchiù...

• Artist:Rocco Galdieri