Cinematografo [Italian translation]

'Ncopp' 'o cartiello steva: "Ammore tragico"

e 'na figura 'e femmena scannata...

S'erano fatte 'na ventina 'e repliche,

ma 'a sala steva giá tutta affullata...

E ghiette i' pure a 'stu cinematografo...

- comme se dice? - pe fatalitá!

D' 'a primma parte, i' subito

dicette: "Ma st'autore,

comm'ha pututo scrivere

chello ca porto 'nchiuso dint' 'o core?"

"Guarda 'stu primmo attore

ca ride si vò' chiagnere...

- dicette uno d' 'o pubblico

ca mme sapeva - arrassumiglia a te!"

"Pecché ce tuorne a 'stu cinematografo?"

"'O vvuó' sapé? Pecché mme piace assaje"

"E che lavoro fanno?" "Ammore tragico..."

"Te piace tanto e nun mme puorte maje?"

"Nun ce vení ca è meglio assaje..." "No, pòrtame"

E che facette pe vení cu me!

"Donna, ti posso chiedere

conto del nostro onore?"

Essa liggette, pallida,

e, lla pe lla, tenette mente a me!

"Ascimmencénne fore!

Ascimmencénne sùbito!"

Io lle dicette: "Assèttate,

ch' 'a terza parte è bella e ll'hê 'a vedé!"

"Ll'ommo mm'arrassumiglia? E chella femmena

fa comme faje tu a me...tiénela mente!"

Essa dicette: "Zitto, ca te sentono!

Pe chi mme faje pigliá 'nnanz'a 'sta gente?..."

Po', 'ncopp' 'o schermo, ascette scritto: Uccidila!

E 'a mana mia s'armaje senza vulé...

Primma 'e se fá chill'ultimo

quadro scritto 'a ll'autore,

dduje colpe se sentètteno...

dduje colpe overe, 'int'a ll'oscuritá!...

"Luce!... Ca 'o primmo attore

sta cca, sta 'mmiez'ô pubblico!

Pubblico, applaudíteme:

ll'ultimo quadro, ll'aggio fatto i' cca!"

• Artist:E. A. Mario