Comme se canta a Napule [English translation]

Comme se canta a Napule

t’ ‘o vvuó’ ‘mpará, pecché giá te n’adduone

ca dint’ ‘o core va nu raggio ‘e sole,

sentenno na canzone.

E Napule chest’è, chesto pò dá.

Pò dá speranze a chi nun spera cchiù,

resate allère e freve ‘e passione.

E basta sulamente

nu mandulino

p’avantá ‘e ttrezze belle e ll’uocchie doce,

n’aria ‘e ciardino,

nu filo ‘e voce,

nu core ardente,

ca, ride o chiagne, vò’ sempe cantá.

Canzone ca suspirano

dint’a na varca o sott’a nu barcone.

Canzone, allère e triste, ca ogne core

se ‘mpara ‘e ogne stagione.

E a chi è straniero e vène, o se ne va,

core lle dice: “Canta pure tu,

ricòrdate stu cielo e sti ccanzone”.

E basta sulamente

nu mandulino

p’avantá ‘e ttrezze belle e ll’uocchie doce,

n’aria ‘e ciardino,

nu filo ‘e voce,

nu core ardente,

ca, ride o chiagne, vò’ sempe cantá.

Pe’ chi se canta a Napule

tu ‘o vvuó’ sapé? P’ ‘e rrose e p’ ‘e vviole,

p’ ‘o cielo e ‘o mare e maje pe’ fá tesore,

p’ ‘ammore e p’ ‘e ffigliole.

Perciò chi nasce dint’a ‘sta cittá,

passa, cantanno, tutt’ ‘a giuventù,

nuttate ‘e luna e matenate ‘e sole.

E basta sulamente

nu mandulino

p’avantá ‘e ttrezze belle e ll’uocchie doce,

n’aria ‘e ciardino,

nu filo ‘e voce,

nu core ardente,

ca, ride o chiagne, vò’ sempe cantá.

• Artist:E. A. Mario