Ddoje serenate [Italian translation]

Stasera, perdunate si v' 'o ddico:

Mettimmoce in accordo e po' sunate!

Nuje ce 'mpuntammo 'mpont' ô stesso vico

E, sunanno, 'mbrugliammo 'e sserenate.

Sunate 'a vosta, i' mme stò zitto e sento!

Facimmo a turno: i' sono doppo 'e vuje.

Si ve servesse ll'accumpagnamento,

Ccà sta 'a chitarra, sunarriamo a dduje!

Ma nun ve dico niente,

Pecché sunammo pe' ddoje 'nnammurate

Ca nun vanno truvanno 'o cuncertino.

Se songo abituate

Ll'una, a sentì 'a chitarra sulamente,

E ll'ata, sulamente 'o mandulino.

'Sta serenata vosta va a chi tene

Ll'uocchie turchine e belle, a comme pare.

Ah, pure nenna mia, ca i' voglio bbene,

Tene ll'uocchie turchine comm' ô mare.

E sta a 'o quarto piano 'a vosta? E comme?

E se chiamma Maria? Maria?! – Maria! –

Tene 'e stess'uocchie? Tene 'o stesso nomme?

Sta ô quarto piano? È 'a 'nnammurata mia!

E nuje ca, ingenuamente,

Venimmo ccà a sciupà 'sti sserenate,

Mentre forse lle sta 'n'ato vicino!

Ce vò tenè appaldate

Pe' se spassà, comme si fosse niente,

Mò cu 'a chitarra e mò cu 'o mandulino.

Allero, amico! E 'o ddico alleramente

Ca 'e scieme comm'a nuje sò tante e tante!

E chesta, ch'era bella veramente,

Nun puteva tenè sulo 'n'amante!

Ma 'n'ati dduje già spontano! E scummetto

Ca songo comm'a nuje: dduje sfurtunate!

Vedimmo 'e cumbinà chistu quartetto,

È bello 'stu quartetto d' 'e cecate!

Vuje nun dicite niente?

Ah, vuje tremmate? Sì, vuje 'ntartagliate

E i' pure tremmo. Parlo, ma scumbino!

Nuje simmo 'nnammurate!

E chiagne 'sta chitarra tristamente

E, tristamente, chiagne 'o mandulino.

• Artist:E. A. Mario