Dinghiridera [English translation]

Dinghi-dinghiridindi-dinghiridera…

Privéndemi de una costa mia

T’at generadu Deus Soberanu

E benis a innoghe a mi ponner marranu!?

Sa ‘oghe mia est ‘oghe de anghelu,

S’abbivant sas istellas in su chelu

A custu sonu de amore e paghe

Frima e forte che unu nuraghe

Armonica, intonada e fiera.

Dinghi-dinghiridindi-dighiridera…

So deo sa femina chi cantende

Allegrat finas a su rusignolu.

Sa ‘oghe durche de su pipiolu

M’at dadu sa natura generosa.

Cando cant’eo fiorit sa rosa

M’accumpagnat su riu canta-canta

Mi sorriet sa zente tota canta

Mustrèndemi un’istima sintzera

Dinghi-dinghiridindi-dinghiridera…

Sa 'oghe mia est sa pius potente

Chi mancu tue nd’as un’idea,

Bella che i’su sole in oriente

Cando saludat sa terra intrea.

Daghi b’at gara su premiu leat

Ca m’iscurtat sa zente riverente.

‘Uriosa che bentos de traschia

Ma connoschet finas sa melodia.

Dinghi-dinghiridindi-dinghiridera…

Finida s’istajone frittorosa

S’acherat su ‘eranu sorridente.

Sa ‘oghe mia no, no est potente

Ma ninnat e carignat dogni cosa.

In sa die ‘e s’affidu est un’isposa

Bella, càndida pura e lughente.

A custu sonu si mudat sa terra

Irmentighende dogni cuntierra.

Dinghi-dinghiridindi-dinghiridera…

Mama Natura chi est gloriosa

De dogni cosa issa est reina.

A nois duos at dadu un’istrina,

Una potente, una armoniosa.

Che vena de abba bundantziosa

No finat mai custa serentina.

Cantende umpare donamus recreu,

Dae chelu nos beneigat Deus.

• Artist:Maria Luisa Congiu