Dint'e nnuttate [Italian translation]

Dinto ’e nnuttate tempestóse e scure,

quanno cchiù nzisto va siscanno ‘o viénto

e se mòveno, nére, nfaccia 'e mure,

ll' ómbre, e ógne vóce pare nu lamiénto,

scetàte all’ antrasatto, ’e piccerille

stènneno ’e bbracce, tutte appaurate,

e se scippano 'nfronte ’e ricciulille

chiammanno 'a mamma cu ’e vvoce abbrucate...

'A mamma corre. Tempestósa e scura

è sèmpe 'a nòtte, e 'o viénto nun se sta...

E dice 'a mamma: — « Nun avè paura,

nu cunto 'e fate te vòglio cuntà... »

« E nce stéva na vòta na Riggina

« ca tenéva 'e capille anèlla anèlla...

« E na varca arrivaie a la Marina...

« E nònna-nònna, e nònna-nunnarèlla...

E pàssano accussì, dint' a sti cunte,

Fate e palómme. E 'o piccerillo 'e vvéde...

« Suónno suónno ca viéne da li munte,

« viéne a cavallo e nun venire a piéde... »

Senza stancarse maie, 'a mamma canta:

« Vienice, suonno ca nun vuò venì!... »

E a poco a poco, cu 'a capa pesanta,

'o piccerillo se tòrna a addurmì...

Accussì, mmiézo 'a vita 'e tutte ll' ore,

mmiézo 'a tempesta e 'o nniro d' 'a nuttata,

faccio pur 'io na faccia appaurata

e guardo attuórno cu n' appiétto 'e còre...

E pènzo: Tuttecòsa è na pazzia!

Pure 'o cunto d' 'e ffate è na paròla...!

Ogne uócchio ca te guarda è na buscia!

Stai mmiézo 'a gènte, e ll'ànema sta sóla...

Ma si nu juórno, caso mai, nu raggio

te schiara 'a vista 'e chéllo che buò tu?...

Embè, tanno chist' uócchie nchiudarraggio

c''o desidèrio 'e non me scetà cchiù!...

• Artist:Ferdinando Russo
• Album:Le videopoesie di Gianni Caputo