Ein meister las [Alterslied] [German translation]

1.

Ein meister las,

troum und spiegelglas,

daz si zem winde

bî der stæte sîn gezalt.

loup und gras,

daz ie mîn fröide was

(swie ich nû erwinde,

ich dunke mich alsô gestalt),

dar zuo bluomen manicvalt,

diu heide rôt, der grüene walt

der vogellîn sanc ein trûrig ende hât

darzuo der linde

süeze und linde.

sô wê dir, Werlt, wie dirz gebende stât!

2.

Ein tumber wân,

den ich zer welte hân,

der ist wandelbære,

wand er bœsez ende gît.

ich solte in lân,

wan ich mich wol verstân,

daz er iht gebære

mîner sêle grôzen nît.

mîn armez leben in sorgen lît,

der buoze wære michel zît.

nû vürhte ich siecher man den grimmen tôt,

daz er mit swære

an mir gebære.

vor vorhten bleichent mir diu wangen rôt.

3.

Wie sol ein man,

der niuwan sünden kan,

hân gout gedingen

oder gewinnen hôhen muot?

sît ich gewan

den muot, daz ich began,

zer werlte dingen,

merken übel unde guot,

dô greif ich, als ein tôre tuot,

zer winstern hant rehte in die gluot,

und mêrte ie dem tiuvel sînen schal.

des muoz ich ringen,

mit sorgen dingen.

nû ringe und senfte ouch Jêsus mînen val.

4.

Heiliger Krist,

sît dû gewaltig bist

der werlte gemeine,

die nâch dir gebildet sint,

gib mir die list,

daz ich in kurzer frist

alsam gemeine

dich sam dîne erwelten kint.

ich was mit gesehenden ougen blint

und aller guoten dinge ein kint,

swie ich mîne missetât der werlte hal.

mache mich reine,

ê mîne unreine

sêle versinke in daz verlorne tal.

• Artist:Walther von der Vogelweide