البارحة [El Bare7a] [English translation]

البارحه يوم الخلايق نياما

بيحت من كثر البكى كل مكنون

قمت اتوجد له وانثر على ما

من موق عيني دمعها كان مخزون

ولي ونة من سمعها مايناما

كني صويب بين الأضلاع مطعون

في ساعة قل الرجا والمحاما

في وقتها كل المخاليق يقفون

والا كما ونة كسير السلاما

خلوه ربعه للمعادين مديون

والا في ونة راعبية حماما

غاد ذكرها والقوانيص يرمون

تسمع لها بين الجرايد حطاما

ومن نوحها تدعي المواليف يبكون

والا رضيع جرعوه الفطاما

أمه غدت قبل أربيعنه يتمون

جاها القضا من بعد شهر الصياما

صافي الجبين بثاني العيد مدفون

كسوه من بيض الخرق ثوب خاما

وقاموا عليه من الترايب يهلون

راحوا بها حزة صلاة الإماما

عند الدفن قاموا لها الله يدعون

يا قبر اسقي ثراك الغماما

نزلٍ من الرحمة عليها يصبون

رضاه والجنة وحسن الختاما

ودموع عيني فوق خدي يهلون

يا ليت أغصان النفل والخزامى

تنبت على قبر به اليوم مدفون

مرحوم يللي ما مشى بالملاما

جيران بيته راح ما منه يشكون

يا وسع عذري وان هجرت المناما

رافقت من عقب العقل كل مجنون

أخذت أنا وياه عشرة اعواما

ما مثلهن في كيفة مالها لون

والله كنه يا عرب صرف عاما

ويا عونة الله صرف الأيام وشلون

أكبر همومي من صغار يتاما

إن شفتهم قدام وجهي يبكون

إن قلت لا تبكون قالوا علاما؟

نبكي ويبكي مثلنا كل محزون

قلت السبب تبكون؟ قالوا يتاما

قلت اليتيم "أنا" وانتوا تسدون

مع الصغار وكل جرح يلاما

إلا جروح بخاطري ما يطيبون

قمت أتوجد عند ربع عداما

جوني على فرقى خليلي يعزون

قالوا تزوج وانس لامه بلاما

ترى العذارى عن بعضهم يسلون

قلت إنها كانت لوسطي حزاما

لو جمعتوا نصفهن ما يسدون

أخاف أنا من غاديات الثمامة

اللي على ضيم الدهر ما يتاقون

أو واحدة ما عقلها بالتماما

تضحك وهي تلدغ على الكف بالهون

تزعل أعياني بالنهر والكلاما

وأنا تجرعني من المر بصحون

والله لولا هالصغار اليتاما

وأخاف عليهم من السكة يضيعون

لا أقول كل البيض عقبه حراما

وأصبر كما يصبر على الحبس مسجون

عليه مني كل يوم سلاما

عدة حجيج البيت واللي يطوفون

صلوا على سيد جميع الأناما

وعلى النبي يللي حضرتوا تصلون

• Artist:Rashed Almajid