Ez verlôs ein ritter sîne scheide lyrics

1.

Ez verlôs ein ritter sîne scheide.

dar umb wart einer frouwen alsô leide:

sî sprach "herre, ich will iu eine lîhen,

der will sich mîn leider man verzîhen;

des ist niht lanc daz ers verwarf.

wie wol ich in dran handel;

dem gibe ich sî gar âne allen wandel".

2.

"Frouwe, lât mich eine rede wizzen,

ob sî zuo dem orte iht sî verslizzen."

"nein sî ûf mîn sêle und ûf mîn triuwe.

ich gap sî mînem leiden man für niuwe.

sî ist dicke als ein bret, niuwan an der

einen stet, dâ ze dem hengelriemen:

daz enschadet iu noch ander niemen."

3.

Er wolt sîn mezzer in die scheide

schieben; dô begunde sich diu klinge

biegen her wider rehte gegen deme

hefte: doch brât er sî drin mit sîner

krefte. schiere het er wider gezogen.

"ez habe ein swarziu krâ gelogen: wer

solte des getrûwen?" - "ziet wider:

diu würze ist noch niht gebrûwen."

• Artist:Neidhart von Reuental