Facìteme magnà lyrics

Santa Lucia, no chélla d’e ccanzóne,

no chélla d’e cantante e l’orchestrina:

io preferisco chélla d’a cucina,

d’a vungulélla ncòpp’o maccaróne;

d’o pésce fritto, fatto uóglio e limóne,

fòra a na tavulélla ‘e na cantina,

piazzato ‘mpónt’o taglio d’a banchina,

cu ‘o pède ncòpp’a barra ‘e nu temmóne.

E chésta è ‘a puisia : niénte cantante,

niénte pusteggia pe putè magnà

nu vermiciéllo a vòngole abbundante

cu ‘o ppetrusino crudo e ‘addóre ‘e scòglie

e, ‘a primma furchettata, t’hê ‘a scustà,

si no svenisce mentre ll’arravuóglie.

Nun pòzzo sentì mùsica scucciante,

si no ‘o spaghètto nun ll’alleggerisco..

e vène appriésso ‘o fritto ‘e pésce fritto

e i’ stóngo già c’o stòmmaco pesante.

È brutto a ffà ‘o mestiére d’o cantante:

ll’aggio fatto pur’io, pirciò ‘o capisco;

embè, che pòzzo ffà, pe mo subisco..

stóngo ô cafè sciantà, no ô ristorante.

Che bèlla còsa..so’ fernute ‘e suóne :

me spacco ‘o merluzziéllo, ‘o lèvo ‘e spine,

cu ll’aglio, ‘o ppetrusino, uóglio e limóne:

ma, si appezzanno ‘a primma mullechèlla,

arapo ‘a vócca e sènto ‘e manduline…

me sóngo ‘ntussecato ‘a tavulélla !!

• Artist:Raffaele Viviani
• Album:Le videopoesie di Gianni Caputo