Galusè [English translation]

Eo so Galusè,

logu delissiosu e de incantu,

firma inoghe su pe’

o passizeri, custu est logu santu.

Eo cunfido in te,

tzertu as a acurrer a mi dare vantu

chin bellas cumpagnias

a t’infriscare chin sas abbas mias.

Eo umile in custa rocca

mai de murmurare apo cessadu:

bentu fritu e froca

an sas venas mias astragadu.

Mai però sa broca

at su nettare sou ismentigadu:

pedidu m’at continu

sos bundantes umores ch’apo in sinu.

Ancoras oe in die

no mi mancant durtzuras e bisitas:

totus current a mie

e si consolant de sas abbas fritas,

E deo rie rie

cuntento brocas mannas e brochitas;

dae custas fritas venas

semper partint sas brocas prenas.

A cust’abba, sididas,

sunt bennidas donosas verginellas,

a mie sunt bennidas

bajanas de Sardigna sas prus bellas.

Totas si sunt fritidas

a mi fagher onore: pastorellas,

signorinas e damas,

de me cuntentas nd’ant contadu fama.

Dae logos istranzos

bennidu b’at dottissimas persones

in festas e in pranzos

cottu b’ant crapitos e anzones

e mandigos licanzos:

puddas, porcheddos, pische e macarrones.

In custas abbas puras

ant ismaltidu celebres cotturas.

Totus s’ant divertidu

ismentighende ‘ogni cuntierra:

preides apo ‘idu

cottos, cantende a sonu ‘e ghiterra;

antzis, nd’apo assistidu

beatamente istrampados in terra,

in bratzos d’una vera,

solenne, reverenda imbriaghera.

E inoghe sa tristura

morit, e torrat s’animu serenu.

Sa sogra cun sa nura

in custas abbas lassant su velenu!

• Artist:Peppinu Mereu
• Album:Poesias