Halmorakel lyrics

In einem zwîvellîchen wân

was ich gesezzen und gedâhte,

ich wolte von ir dienste gân,

wan daz ein trôst mich wider brâhte.

Trôst mag ez rehte niht geheizen, ôwê des!

ez ist vil kûme ein kleinez troestelîn,

sô kleine, swenne ichz iu gesage, ir spottet mîn.

doch fröut sich lützel ieman, er enwizze wes.

Mich hât ein halm gemachet frô:

er giht, ich sül genâde vinden.

Ich maz daz selbe kleine strô,

als ich hie vor gesach von kinden.

Nû hoeret unde merket, ob siz denne tuo:

"si tuot, si entuot, si tuot, si entuot, si tuot!" –

swie dicke ich alsô maz, so was daz ende ie guot.

daz troestet mich: dâ hoeret ouch geloube zuo.

• Artist:Walther von der Vogelweide