Helbesta bênav lyrics

Dîlan di dîlanê

Şîn bi ser şînê de...

Ev kî ne?

Aya ev ayîn,

Ev rûçik ê min e?

Gelo ez im

Ê di stûyê wi de toq,

Mêjiyê wî qeyd û bendkirî

Di nava keriyek dîl de…

Laşê di nav xakiyan de hatiye çewisandin?

Gelo ez im

Ê bi tarîtiyê hatiye fetisandin;

Ew sawîra ku ronahî wenda kiriye

Di nava wan çavên “Tisîna mar” de mayî ye

Û...

Ji keriyê xwe hatiye dizîn

Di nava artêşa serkeftî de

Bi ala spî?..

Na!..

Ne ez im,

Ezê di mirêkê de;

Ne ez im

Ê di tariyê de stran digotin.

Mêr im,

Serhildêr im ez!

Avên bi coş difûrin,

Xilava sor dipijiqe ji mêjiyê min.

Asê me ez!

Agirê çiyan

Çiyayên bi rûmet,

Yên serhildanê

Û ...

Biserketî,

Di dilê min de,

Di zend û bendên min de

Hene ku...

Coşa bi wan

Mîna mizgîna cejnê…

Dibêjin:

“Çiya, çiya, lo çiyanino!...”

• Artist:Bro Omerî