Il reduce lyrics

Spècia un àttim a cascià via ’l suu

e a lassamm de par me cun l’umbrìa;

in söl müür la tua cruus par che dunda

quand che pizzi ’l camen.

La pultrona cugnuss el me pees

ma a sfundàla l’è quèsta memòria

che l’è scià cul sò fiaa de zampogna

per mea famm durmì.

E se vardi sto guantu de pèll

cun suta un pügn faa de lègn,

se dumandi se la man che ho perdüü

l’è dree amò a sparà.

O forsi l’è sta ’l tò regaal

strepamm via quèla man sciagürada

che pregava per mea fass cupà

e sparava sparava sparava

a oltra geent che sparava;

e sparava sparava sparava

a oltra geent che pregava.

Eri mai cupaa gnaa un fasan

e ho trataa sèmpru bee anca i furmiigh.

Sérum in tanti cargà in sö quèl trènu

cume föi destacaa,

e imparaum la geografìa

nel cüntà ogni siit che brüsàva,

e la scendra de tüta l’Euròpa

ghe l’ho ancamò in buca.

Per el viaggio de nòzz cun la mort

hemm cataa fö Nikolaevka

e brindaum cul giazz e cul föch

e ’l müsón ne la palta.

E la spusa vestida de negru

quanta geent l’ha purtaa in söl sò altaar,

e intaant che ghe davi la man

la girava la facia luntan

vèrso quei che basava,

e però la lassava ’l sò anèll

a sto omm che turnava.

La tua cruus la g’ha sèmpru tri cioo,

e la mia uviameent vön in mènu,

ma son qui con la stessa preghiera,

come ogni sera;

te la scrivo col sangue non speso

e una penna nera.

• Artist:Davide Van de Sfroos