In dem aberellen [German translation]

1.

In dem aberellen

sô die bluomen springen,

sô louben die linden

und gruonen die buochen,

so singent die vogele

und habent ir willen,

wan si minne vinden

aldâ si suochen

an ir gnôz,

wan ir blîdeschaft ist grôz,

der mich nie verdrôz.

wan si swîgen al den winter stille.

2.

Dô si an dem rîse

die bluomen gesâhen

bî den blaten springen,

dô wâren si rîche

ir manicvalden wîse,

der si wîlent pflâgen.

si huben ir singen

lûte und vroelche,

nider und hô.

mîn muot stât alsô,

daz ich wil wesen vrô.

reht is, daz ich mîn gelücke prîse.

3.

Mohte ich erwerben

mîner frouwen hulde!

künde ich die gesuochen,

als ez ir gezaeme!

ich sol verderben

al von mîner schulde,

sî enwolte ruochen,

daz si von mir naeme

buoze sunder tôt

ûf gnâde und durch nôt.

wan ez got nie gebôt,

daz dehein man gerne solte sterben.

• Artist:Heinrich von Veldeke