Io te cerco scusa lyrics

Io te cerco scusa ‘e chello c’aggio fatto

Pecché nun sapevo, pecché ero distratto

Scusa ‘e tutto ‘o mmale ca tu aviste allora

Scusa pure si io nunn’ero nato ancora

Scusa ‘e chillu munno ca s’è perduto

Addò tu currive comm’a ‘na criatura

Sott’a luce d’o sole senza stanchezza

Sott’a luce d’e stelle senza paura

Scusa ‘e chillu suonno de marenaro

Ca pe’ primmo ascette da Gibilterra

Pe’ tenta’ la sorte e asci’ pe’ mare

Pe’ guarda’ luntano e scupri’ ‘na terra

Scusa ‘e chella scienza che navigava

Sempre cchiù luntano fino a chella terra

Pecché nun sapeva che ce truvava

Pecché nun sapeva che purtava ‘a guerra

E tutt’a furtuna de Francia e Spagna

Nunn’è niente a ffronte ‘e chella bellezza

E nun po’ bastare pe’ riscattarla

Tutto l’oro d’o munno, tutt’a ricchezza

E cu Nina, Pinta e Santa Maria

Arrivava ‘o viento d’a civiltà

Ca purtava a pace e ‘a libertà

E io te cerco scusa ‘e chella bugia

Chesta nun sarrà ‘na canzone d’ammore

Pecché ‘na carezza nun c’è mai stata

Però certamente ce trase ‘o core

Pecché è ‘na canzone de ‘nnammurato

‘Nnammurato ‘e ‘na favola luntana

‘E ‘na donna ca nun ha cunusciuto

‘Nnammurato ‘e chella bellezza indiana

C’appartene a nu munno ca s’è perduto

Io te cerco scusa ‘e chello c’aggio fatto

Pecché nun sapevo, pecché ero distratto

Scusa e tutto ‘o mmale ca tu aviste allora

Scusa pure si io nunn’ero nato ancora

• Artist:Eugenio Bennato
• Album:Che il Mediterraneo sia (2001)