Ir reiniu wîp, ir werden man [Alterston] lyrics

1.

Ir reiniu wîp, ir werden man,

ez stât alsô, daz man mir muoz

êre und minneclîchen gruoz

nû volleclîcher bieten an.

des habent ir von schulden groezer reht danne ê.

welt ir vernemen, ich sage iuch wes:

wol vierzig jâr hab ich gesungen unde mê

von minnen und als iemen sol.

dô was ich sîn mit den andern geil,

nû enwirt mirs niht, ez wirt iuch gar.

mîn minnesang, der diene iuch dar

und iuwer hulde sî mîn teil.

2.

Lât mich an eime stabe gân

und werben umbe werdekeit

mit unverzagter arebeit,

als ich von kinde hân getân,

sô bin ich doch, swie nider ich sî,

der werden ein, genuoc in mîner mâze hô!

daz hazzent die nidern, ob mich daz iht

swache? nein! die werden hânt mich deste

baz. diu werde wirde; diu ist sô guot,

daz man irz beste lop sol geben.

ez wart nie lobelîcher leben,

swâ man dem ende rehte tuot.

3.

Werlt, ich hân dînen lôn ersehen:

swaz dû mir gîst, daz nimest dû mir.

wir scheiden alle blôz von dir.

schame dich, sol mir alsam geschehen!

ich hân lîp unde sêle -des was gar ze vil -

gewâget tûsent stunt durch dich.

nû bin ich alt und hâst mit mir dîn gumpelspil,

und zürne ich daz, sô lachest dû.

lache uns eine wîle noch!

dîn jâmertac wil schiere komen

und nimt dir, daz dû uns hâst benomen,

und brennet dich dar umbe ie doch.

4.

Mîn sêle müeze wol gevarn!

ich hân zer werlte manigen lîp

gemachet frô, man unde wîp.

kunde ich dar under mich bewarn!

lobe ich des lîbes minne, daz ist der sêle leit

und giht, ez sî ein lüge, ich tobe.

der wâren minne giht si ganzer stætekeit,

wie guot si sî, wie si iemer wer.

"Lîp, lâ die minne, diu dich lât

und habe die stæten minne wert!

mich dunket, der dû hâst gegert,

diu sî niht visch unz an den grât."

5.

Ich hât ein schœne bilde erkorn,

und owê, daz ichz ie ie gesach

und ouch sô vil zuo ime gesprach!

ez hât schœne und rede verlorn.

dâ was ein wunder inne, daz vuor ich

enweiz war, dâ von gesweic daz bilde iesâ.

sîn lilien rôse varwe wart so karker var,

daz ez verlôs smac unde schîn.

mîn bilde, ob ich gekerchet bin

in dir, sô lâ mich ûz alsô,

daz wir ein ander vinden frô,

wan ich muoz aber wider in.

• Artist:Walther von der Vogelweide