Istasera un'Organittu [Serenada de Ierru] [English translation]

Istasera un’organittu

sonat in sa cantonada;

est una notte isteddada,

est una notte isteddada.

Cal’est s’amore lontanu

chi m’amentat custu sonu?

De chi’ est custu resjonu

antigu dulche e galanu?

Bessit dae Campidanu,

falat dae Logudoro?

No isco, no isco.

Intantu su coro

iscultat sa serenada.

Sos montes sunt ispozados,

falat bianca s’iddia;

e paret cust’armonia

boghes de amores passados,

de coros iscunfortados

in tropu mala fortuna

chi dimandan nessi una

die felice e pasada.

Istasera un’organittu

sonat in sa cantonada;

est una notte isteddada,

est una notte isteddada.

Cantan forsis de fulana

cudda bellesa divina?…

Una pobera ‘ighina

mesu etza e pagu sana,

issa puru a sa ventana

s’acerat pro iscultare.

No est pro innamorare,

ma iscultat incantada,

iscultat sa serenada.

Ind’un’atera istajone,

cantaiant pro issa puru

a facca de su etzu muru,

suta su etzu balcone,

calchi festosa cantone

calchi mutu fentomadu.

Ma totu custu est passadu,

ne tenet pius torrada.

Istasera un’organittu

sonat in sa cantonada,

est una notte isteddada,

est una notte isteddada.

• Artist:Marisa Sannia