Kilmat "Akhi" - كلمة أخي [Rashid's poem] lyrics

سالت دموع أحمد، حفيد اللي لهم طيبٍ وجاه

قلت: الدموع تترجم اللي مستحيل يترجمه

هاجوس شاعر، لو تناقل شعره كبار الرواه

بعض المواقف، يستحي عن وصفها حبر قلمه

والله يا أحمد لو تعرف الصدر هذا وش وراه

وراه حزنٍ لو بغيت أكتمه، وشلون أكتمه؟

حزني على راشد هو أغلى حزن، وأنا من نباه

الطيب، أوصيت العيون إنها بدمعي تكرمه

لو الحزن يقدر يرده، ما ذخر جفني بكاه

حزنت لين الشمس تصبح في عيوني مظلمه

لو أتمنى شي من دنيا الفنا، كان المناه

إن العمر يقسم ما بين اثنين، حتى أقسمه

وأعطيه نصف العمر، وأشوفه على قيد الحياة

وأعلمه وش كبر قدره في الصدر، وأعلمه

إنّه هنا، في القلب، لين العمر ياصل منتهاه

وإني أحارب حزني بذكره وطيبه وأهزمه

أهزمه قدام العرب، واتحسّب إن قلبي حصاه

وإن صرت بلحالي كوى كبدي بحامي ميسمه

وأحس بالكية في وسط القلب من كل اتجاه

أكابر بعزة ونفسي للحزن مستسلمه

في كل دارٍ زرتها لي أطيب الذكرى معاه

لكنها صارت بعد فرقاه ذكرى مؤلمه

واللي يفاخر بين خلق الله بكثرة أصدقاه

إن كان ما يفهم! مصير النايبات تفهّمه

والنعم في الصاحب، لكن الأخ يفرق مستواه

عن مستوى صديقك اللي يحشمك، أو تحشمه

الصاحب فلحظة غضبه، يضيع طيبه في رداه

يبيع حبك بأرخص الأثمان مهما تخدمه

وأخوك ما يقدر يبيعه، لأنه أصلًا ما شراه

خُلق وحبك وسط خفاقه ويجري في دمه

يزعل، لكن لا قلت له "يا اخوي" يحتضنك رضاه

دائم أحاسيس الأخوة بالمحبة تلهمه

كلمة "أخي" من فم أخي، أجمل ما تنطقه الشفاه

لأن منبعها خفوقه قبل ينطقها فمه

ليت القبر يعرف مقام اللي دفنّا في ثراه

يا مَعظمه حيٍ وهو ميت بعد يا مَعظمه

ما عاد لك يا أحمد ولا لي، غير ندعي في الصلاة

ونقول: يا راحم عبيدك من عذابك تعصمه

قبله جنود بلادنا ضحوا لجل تذعن عداه

الله يصبرنا على فرقاه، والله يرحمه

• Artist:Hamdan Al-Maktoum (Fazza)