La cançó del soldadet [Sardinian [southern dialects] translation]

Ascurtai sa cantzoni ‘e su sordadeddu,

chi de una ventanedda de sa navi

bit chi funti bolendi farzias nieddas!

E no est ch’inci cumprendat meda su sordadeddu,

però, su chi bolint is farzias,

at a depi bolli nai chi sa terra est accanta.

E depit essi aici accanta ch’indi calat su capitanu

cicchendi de non parri nervosu

in s’interis chi acabat is istrutzionis:

“Concentreisì, sordadeddus, aturai attentus

e agguantaisì a sa vida

cun is ungas e cun is dentis”.

In coberta is hominis funti giai preghendi.

In coberta is hominis funti giai preghendi.

E narat “amen” pagu cumbintu su sordadeddu,

e acarissiat su fusili cosa sua

cicchendi de no pensai a nudda.

De sa prua si bint is cucurus sempri prus mannus,

“sordadeddu, coràgiu,coràgiu,

chi dependit de genti comenti a tui sa sorti ‘e su mundu”.

Ma “si una balla enemiga atruessat su bentu

E mi stampat su xrobeddu”,

si pensat su sordadeddu,

“is undas m’ant a tragai

E milli piscis colorìus

Ant’a certai po s'inci sgallupai is carris mias”.

E inzandus pensat “deu m’accuu;

candu non castiant, deu m’accuu”.

Ma cuddus castiant sempri, e sa navi s’est arrescendi,

is pontilis si funti obertus

e totu in d’una su mari s’inundat

de sordaus sparendi a s’infinìu

cun d’unu sordadeddu in mesu

affrachendi e frastimendi a s’enemigu.

E intr’e una bomba e s’atra ddi andat totu abbastantzia beni

Fintzas a candu una dd’arruit propiu a su costau.

Prima narat “bonasorti, ti dd’as iscampada…”,

ma a pustis intendit unu dolori stranu a sa schina

e tochendisidda ddi abarrat totu su bratzu manciau de sanguni.

Gira sa conca de una parti a s’atra

Si setzit in s’arena e si pasiat.

E in s’interis ch’indi arribat cussu catzu ‘e dottori, su sordadeddu

s’asseliat arrepitendi

su chi at a fai, aundi at a andai, si campat:

“Ap’a andai anch’e mama, totu beni bistìu,

e, prima’e totu, dd’ap’a depi nai

de mi perdonai po dd’essi trattada sempri diaici;

ap’a andai anch’e Margarita a ddi fai unu fillu

po chi, sceti a ddu biri, potza cumprendi

chi ddu stimu prus de su chi mi stimu a mei ‘e totu.

• Artist:Manel
• Album:10 milles per veure una bona armadura (2011)