Гар ўлсам lyrics

Самодаги юлдузларга кўчсам ҳамки,

Зулматларда шамдек ёниб, ўчсам ҳамки,

Олисларда сендан айро тушсам ҳамки,

Дарё бўлиб, тошар кўнглим, тошар кўнглим,

Юрак сендек уриб турар, она юртим.

Сен бўлмасанг, бўлармидим Юлдуз бу кун,

Ишқингда қалб ёнар кеча-кундуз бу кун,

Чуқур ботди қалбимга бир илдиз бу кун,

Илдизидан узилса ким, шаксиз сўлар,

Илдизидан узилмаган – чинор бўлар.

Гар ўлсам, бешигимнинг ёпинчиғин топинглар,

Йиртиқ-ёмоқ бўлса-да, тобутимга ёпинглар.

Кўрсинлар йиғлаганлар, умрим бари хатодир,

Бу дунёда топганим шу бир парча матодир.

Шу бир парча матодир.

Сенга томон талпинарман, юрагим – сен.

Ҳар қадамда паноҳ менга, керагим – сен.

Қайда бўлмай, сенинг битта бўлагингман.

Кечолмасман сендан, асл ўзлигимсан

Қора қошли, қора кўзли ўзбегимсан.

Мен ватанни алишмасман дунёларига.

Алишмасман Париж-Рим-Амирқоларига.

Тупроғингнинг заррасидек тиллоларига.

Она юртим, тилман сенга, дил-бандингман.

Хизматингга камарбаста фарзандингман.

Гар ўлсам, бешигимнинг ёпинчиғин топинглар,

Жулдур-жамоқ бўлса-да, тобутимга ёпинглар.

Кўрсинлар йиғилганлар, умрим бари хатодир,

Бу дунёда топганим шу бир парча матодир.

Шу бир парча матодир.

Чиқмай туриб ширин жони баданидан,

Кечмас Юлдуз ўз элидан, Ватанидан.

Айро тушмас булбул ҳам ўз чаманидан.

Булбул бўлиб наво қилдим боғларингда,

Гарчи қанча алам қолди зоғларингда,

Алам қолди зоғларингда.

Гар ўлсам, бешигимнинг ёпинчиғин топинглар,

Йиртиқ-ёмоқ бўлса-да, тобутимга ёпинглар.

Кўрсинлар йиғилганлар, умрим бари хатодир,

Ҳаётимда топганим шу бир парча матодир.

Шу бир парча матодир,

Умрим бари хатодир,

Шу бир парча матодир.

• Artist:Yulduz Usmonova