منطقي [Manteqy]

منطقي لما يبقى يتيم وأمي ويبقى سيد العالمين

منطقي الحُسَّاد هتكتر والعدا والكارهين

واللى هيقولك ده شاعر

واللى هيقولك دا ساحر

واللى هيقولك دا كافر

واللى يكتب واللى يرسم

واللى يكدب واللى يشتم

منطقى

هى غيره .. زى غيرة الوليد بن المغيره

مش كان هيسلم؟! بس حاجه فى نفسه حَكِّتْ

كبره خلَّى نفسه شَكِّتْ

أصل داء الكبر ده أكبر خطر

بس يعنى الجَنَّه تِعْمَرْ وحدها؟!

حَبَّه فى الجنه ونعيمها وحَبَّه فى سقر .. منطقي

كل القلوب إلى الحبيب تميل .. ومعي بذلك شاهد ودليل

أما الدليل إذا ذكرت محمداً صارت دموع العاشقين تسيل

ومنطقي لما يبقوا المسلمين حالهم كدا تطلع ضوافر للعِدا

مادمت مش زارع بإيدك غلتك

و الجوع قرص على معدتك .. فا ذَلِّتَك

مادمت متشتت وتايه فى الكلام

فين الودان اللى هتسمع شكوتك؟!

ومنين يجيلك وش تحمق ولَّا تغضب

ولَّا ترفع كلمتك؟!

هما مش قاصدين يهينوا المصطفى بحبة صور

هما عارفين إن سَيِّدنا النبي سيد البشر

هما قاصدينك وقاصدينِّى وقاصدين كل جيلنا

و طول ما بِنْكَسِّلْ ونتفرَّق وبندارى الحقايق

لسه ياما راح يجيلنا

كل القلوب إلى الحبيب تميل .. ومعي بذلك شاهد ودليل

أما الدليل إذا ذكرت محمداً صارت دموع العاشقين تسيل

لو كانوا حضروه كانوا عرفوا يرسموه

كانوا هيسموه بعدله وبسماحته وبهدوءه

كانوا شافوا إن الصحابه بتلحق الميه اللى نازله من وضوه

لو كانوا لحقوه كانوا عرفوا يرسموه

إحنا ما رسمناش نبينا فى العيون

إحنا فهمناهم إن الدين بتاعنا لا فيه علوم ولا فيه عمل

ولا فيه أدب ولا فيه فنون

اتلهينا باحنا كنا و احنا كنا

و نمنا فى اللى راح يكون

بس احنا فوقنا بجد أسفينلك وراجعينلك

شعبك نشيط عامل وصافي وتقي

زيك يا سيدنا النبى يابو قلب طاهر نقى

أما اللى واكلاهم غيرتهم فا ده منطقى

فمبلغ العلم فيه أنه بشراً وأنه خير خلق الله كلهم

فانسب إلى ذاته ما شئت من شرف وأنسب إلى قدره ما شئت من عظم

مولاي صلى وسلم دائما أبدا على حبيبك خير الخلق كلهم

• Artist:Hisham Algakh