Muget ir schouwen [German translation]

Muget ir schouwen, waz dem meien

wunders ist beschert?

Seht an pfaffen, seht an leien,

wie daz allez vert!

Grôz ist sîn gewalt –

ine weiz, obe er zouber künne:

swar er vert in sîner wünne,

dân ist niemen alt.

Rôter munt, wie dû dich swachest –

lâ dîn lachen sîn!

Scham dich, daz dû mich an lachest

nâch dem schaden mîn.

Ist daz wol getân? –

ôwê sô verlorner stunde,

sol von minneclîchem munde

solch unminne ergân!

Scheidet, frouwe, mich von sorgen,

liebet mir die zît!

Oder ich muoz an fröiden borgen.

daz ir saelic sît!

Muget ir umbe sehen? –

sich fröit al diu welt gemeine:

möhte mir von iu ein kleine

fröidelîn geschehen!

• Artist:Walther von der Vogelweide