Nàpule bèllo [Italian translation]

Vuje ca nn’avite ʹmmiria

screvite, sì, screvite,

stampate e pubblicate

chéllo ca vuje vulite,

cóntr’ô paése nuósto,

pe screditarlo, ma

vuje ce perdite ‘a gnòstia,

‘o tiémpo e ‘a serietà.

È trascurato, è ovèro,

ma tène gènio e còre:

arrassumiglia pròpio

ô studio ‘e nu pittóre.

Tutto ‘mbrugliato : téle

pe tèrra o appése ê mmure;

ncòpp’a nu tavulino,

'mmiscate cu ‘e culure :

pénne, penniélle, làppese

e, 'mmiézo, nu bicchiére

e na buttéglia ‘e vrito

ca fa da canneliére,

(quanno manca ‘a currènte).

E… sótt’ô tavulino,

nu sàtiro, na Vènnere

ʹe gésso e n’amurino…

Cca 'ncòpp’a nu divano,

giurnale e giurnalètte,

llà, affianco a nu ritratto,

nu mazzo ‘e vïulette..

Embè, 'mmiéz’a 'sti ccòse

‘mbrugliate a ccà e a llà

vuje ce truvate, ê vvòte,

'o quatro ca fa ncantà.

Nàpule è tale e quale:

'nziéme cu ‘e panne spase,

cu ‘e vasce, ‘e sottoscale

ca sèrveno pe case,

e 'nziéme cu ‘e pianine,

cu ‘e viche spuórche e scure,

cu ‘e vacche ca passéjano

p’e strate.... tène pure,

guardate : Marechiaro,

sulagno e malïuso,

Santa Lucia, ‘o Visuvio,

Pusìlleco addiruso,

‘o spècchio ‘e Margellina,

‘o Vòmmero ca dice:

Venite, gènt’allèra,

ve vòglio fà felice !!

E tène n’aria tènnera

ca addóra e ca cunzòla,

'nu mare e chistu ciélo

sèmpe ‘e culóre viòla.

Napule è bèllo, è bèllo;

e chi ne dice male

o è pazzo o è malamènte

o pure è n’animale.

• Artist:Pasquale Cinquegrana