Nòtte d'Austo lyrics

P’o càvuro, ‘a nòtte,

te mine d’o liétto;

t’affacce ô balcone,

strignènnete ‘mpiétto.

E i’ pènzo, ‘a rimpètto:

« M’ha visto? Chi sa?»

Ma tu nun me vide!

Nun pènza stu còre,

ca ll’uócchie nun nzèrro,

nun già p’o calóre..

gnornò! Ma p’ammóre

ca chésto me fa!

Risciata!.. Ca ll’aria

d’a nòtte fa bbène!

Io ‘o ssaccio, che tèngo

nu ffuóco p’e vvéne!

E ‘o ssape chi tène

na smania ‘e murì!

Suspira! Rùmmane

vicino â ringhiéra!

Nun già cómm’ô juórno,

nun già cómm’â séra..

Che faje chélla céra

pecchè ce stóngo i’ !

Ah! Cómm’è serena

sta nòtte d’ Austo !

Mo, fòr’ô balcóne,

può stà sènza busto..

pecchè nun daje gusto

a... cchi nn‘o vvuò dà!

Pecchè tu nun piénze

che cchi sta rimpètto,

â nòtte, ògne nòtte,

p’ammóre a dispiétto,

nun véde cchiù ‘o liétto,

che chiù nun se fa!

• Artist:Rocco Galdieri
• Album:Le videopoesie di Gianni Caputo