O Jerusalem [Neapolitan translation]

O Ierusalem, aurea civitas,

ornata regis purpura,

o edificatio summe bonitatis,

que es lux numquam obscurata,

tu enim es ornata

in aurora et in calore solis.

O beata puericia,

que rutilas in aurora,

et o laudabilis adolescentia,

que ardes in sole.

Nam tu, o nobilis Ruperte,

in his sicut gemma fulsisti,

unde non potes abscondi

stultis hominibus,

sicut nec mons valli celatur.

Fenestre tue, Ierusalem,

cum topazio et saphiro

specialiter sunt decorate.

In quibus dum fulges, o Ruperte,

non potes abscondi

tepidis moribus,

sicut nec mons valli,

coronatus rosis, liliis et purpura,

in vera ostensione.

O tener flos campi

et o dulcis viriditas pomi,

et o sarcina sine medulla

que non flectit pectora in crimina.

O vas nobile

quod non est pollutum

nec devoratum

in saltatione antique spelunce,

et quod non est maceratum

in vulneribus antiqui perditoris –

in te symphonizat Spiritus Sanctus,

quia angelicis choris associaris,

et quoniam in filio Dei ornaris,

cum nullam maculam habes.

Quod vas decorum tu es,

o Ruperte,

qui in puericia

et in adolescentia tua

ad Deum anhelasti in timore Dei,

et in amplexione caritatis,

et in suavissimo odore bonorum operum

O Ierusalem,

fundamentum tuum positum est

cum torrentibus lapidibus,

quod est cum publicanis et peccatoribus,

qui perdite oves erant,

sed per Filium Dei invente

ad te cucurrerunt

et in te positi sunt.

Deinde muri tui fulminant vivis lapidibus,

qui per summum studium bone voluntatis

quasi nubes in celo volaverunt.

Et ita turres tui, o Ierusalem,

rutilant et candent per ruborem

et per candorem sanctorum,

et per omnia ornamenta Dei,

que tibi non desunt, o Ierusalem.

Unde vos, o ornati

et o coronati,

qui habitatis in Ierusalem,

et o tu, Ruperte,

qui es socius eorum in hac habitatione,

succurrite nobis famulantibus

et in exilio laborantibus.

• Artist:Hildegard von Bingen
• Album:O Jerusalem