Omne genus demoniorum [54] lyrics

1.

Omne genus demoniorum

cecorum,

claudorum

sive confusorum,

attendite iussum meorum

et vocationem verborum.

2.

Omnis creatura phantasmatum,

que corroboratis principatum

serpentis tortuosi,

venenosi,

qui traxit per superbiam

stellarum partem tertiam,

Gordan,

Ingordin et Ingordan:

per sigillum Salomonis

et per magos Pharaonis

omnes vos coniuro

omnes exorcizo

per tres magos Caspar,

Melchior et Balthasar,

per regem David,

qui Saul sedavit,

cum iubilavit,

vosque fugavit.

3.

Vos attestor,

vos contestor

per mandatum Domini,

ne zeletis,

quem soletis

vos vexare, homini,

ut compareatis

et post discedatis

et cum desperatis

chaos incolatis.

4.

Attestor,

contestor

per timendum,

per tremendum

diem iudicii,

eterni supplicii,

diem miserie,

perennis tristitie,

qui ducturus est

vos in infernum,

salvaturus est

nos in eternum.

5.

Per nomen mirabile

atque ineffabile

Dei tetragrammaton,

ut expaveatis

et perhorreatis,

vos exorcizo,

Larve,

Fauni,

Manes,

Nymphe,

Sirene,

Adryades,

Satyri,

Incubi,

Penates,

ut cito abeatis,

chaos incolatis,

ne vas corrumpatis

christianitatis.

6.

Tu nos, Deus, conservare ab hostibus digneris!

• Artist:Carmina Burana
• Album:Carmina moralia et satirica. De cruce signatis