Paristórias

Rajos de luna, sa paristória,

Càntigos d'una antiga memória.

Antiga zente sétzida umpare,

Chi frecuente solet contare.

Mama 'e Funtana, Mama 'e su 'Entu,

Timinzu dan a su pensamentu.

Maria Fressada, Maria Lentolu

Mi’! Ch'es passada s'Istria in bolu!

E dilliri dilliri…

Súrbiles, Cogas o Maschinganna,

Súffiu non bogas, serra sa janna.

Mama 'e su Sole o sa Farranca,

Su coro dolet, sa Cara Bianca.

Momoti, Réula sun in s'iscuru,

Falat sa néula in domo puru.

Lughia Rabiosa chi no dat nudda,

Pedra 'ogni cosa, pesat sa tudda.

E dilliri dilliri…

Sa Petenedda mal'assentada,

Musca Macedda si'ch'est bolada.

Como sas Panas chircan su fizu,

Fuin sas Janas in su lampizu.

S’Ammutadore in su reposu

Es traitore, furat su gosu.

S'Acabadora misteriosa

Est s'úrtim'ora prim'e sa losa.

E dilliri dilliri…

Arza, Doddoni e sa Surtora,

Santu Juanne prega dogn’ora.

Tentassione, bae in ora mala,

Dogni pessone trampat in gala.

Sa Conca Mutza cun sa Marruda,

Bruja arramutza, sinnada e muda.

Manu pilosa, 'ides sos sinnos?

Furat sa cosa, furat pitzinnos.

E dilliri dilliri…

Antiga zente sétzida umpare,

Chi frecuente solet contare.

Rajos de luna, sa paristória,

Càntigos d'una antiga memoria.

• Artist:Emanuele Garau
• Album:Ballos e Pregadorias, 2020