Pianefforte 'e notte lyrics

Nu pianefforte ‘e notte

sona luntanamente,

e ‘a museca se sente

pe ll’ aria suspirà.

È ll’una: dorme ‘o vico

ncopp’ a sta nonna nonna

‘e nu mutivo antico

‘e tanto tiempo fa.

Dio, quanta stelle ncielo!

Che luna! E c’ aria doce!

Quanto na bella voce

vurria sentì cantà!

Ma sulitario e lento

more ‘o mutivo antico;

se fa cchiù cupo ‘o vico

dint’ a ll’oscurità.

LI’ anema mia surtanto

rummane a sta fenesta.

Aspetta ancora. E resta,

ncantannose, a penzà.

• Artist:Salvatore Di Giacomo
• Album:Arie e sunette