Presul vere civitatis [German translation]

O presul vere civitatis,

qui in templo angularis lapidis

ascendens in celum,

in terra prostratus fuisti

propter Deum.

Tu, peregrinus a semine mundi,

desiderasti exul fieri

propter amorem Christi.

O mons clause mentis,

tu assidue pulcram faciem aperuisti

in speculo columbe.

Tu in absconso latuisti

inebriatus odore florum,

per cancellos sanctorum

emicans Deo.

O culmen in clavibus celi,

quod propter perspicuam vitam

mundum vendidisti:

hoc certamen, alme confessor,

semper habes in Domino.

In tua enim mente

fons vivus clarissima luce

purissimos rivulos eduxit

per viam salutis.

Tu magna turris

ante altare summi Dei,

et huius turris culmen obumbrasti

per fumum aromatum.

O Disibode,

in tuo lumine

per exempla puri soni

membra mirifice laudis edificasti

in duabus partibus

per Filium hominis.

In alto stas,

non erubescens ante Deum vivum,

et protegis viridi rore

laudantes Deum ista voce.

O dulcis vita

et o beata perseverantia

que in hoc beato Disibodo gloriosissimum

lumen

semper edificasti

in celesti Ierusalem.

Nunc sit laus Deo

et in forma pulcre tonsure

viriliter operante.

Et superni cives gaudeant

de his qui eos

hoc modo imitantur.

• Artist:Hildegard von Bingen
• Album:The complete Hildegard von Bingen vol. III.