Primo coro delle lavandaie lyrics

Da stammatina

Tammorr'e trombe!

Tammorr'e trombe!

Tammorr'e trombe!

E de cennere n'aria c'abbampa!

E de cennere n'aria c'abbampa!

Da stammatina tammorr'e trombe

Tromb'e tammorre

Comm'a quanno pass' 'a sulitaria

D' 'o viennarì santo!...

Da stammatina 'na scarpa vacante

Purtata 'mprucessione

E 'ncopp' 'e castielle

Ciente cannune cu 'a vocc'aperta contr' 'o cielo

Aspettanno 'nu signale

Pe' fa' tremma' 'e paura o 'e gioia

Tutt' 'e llastre d' 'e case!...

E aspiette, aspiette

Oi core fino a ttanno!

Core fino a ttanno!

Si chesta varca nun è gghiut'a funno

Nun è gghiut'a funno!

È comme si 'sta jurnata

Avesse fatt' 'o peccato

'E schiara' cu 'nu pere scavezo

Ca tuttuquante nun vereno ll'ora 'e cummiglia'!

Pure 'o mare

Stammatina sott' 'o sole

Pareva 'na jastemma senza voce

E pure 'a voce d' 'e fecaiuole

Nun tene 'o curaggio

D'appanna' chest'aria pesante

Comm' 'a cennere dopp' 'o ffuoco!...

Aiuto, aiuto

Lu munno s'è perduto!

Munno s'è perduto!

Li mmonache

Se vonno 'mmaretare!

Vonno 'mmaretare!

Avite 'ntis' 'e surdate?

Sule lloro rireno

E cantano canzone furastiere

Ca nuie nun cunuscimmo

E ca se sentono quanno s'è perza 'na guerra!

E invece tutto chesto

Pe' 'na scarpa perza

Comme si se fosse perz' 'a rota d' 'o munno!

E 'o rre fa' 'na legge nova

Cumannanno 'na prova

A onor'e gloria

D' 'a passiona ca l'ha muzzecato!

E a gloria d' 'o rre

'Stu paese s'è fermato

Rint'a 'na connola busciarda

Aspettanno sulo 'nu terramoto

'Na lav' 'e fuoco

'Na guerra

Pe' pute' allucca' e chiagnere

Verenn' 'o miraculo

'E 'nu santo senza capa

'E 'nu pere senza scarpa!

Ammore, ammore mio

Fatt' 'o tavuto!

Fatt' 'o tavuto!

E 'a rinto te ce miette fravecato!

Miette fravecato!

- Penzate a chella c'ha perzo 'sta scarpa!

'Na corz'all'alba cu 'e guardie appriesso

E 'o core 'nganna p' 'a paura!

- Paura 'e che?

- E chi 'o ssape!

Puo' ssape' maie cher'è ca te fa' paura?

Vire stu sole! Pare ca te vo' bbene

Ma 'e vvote nun pare ca te vulesse 'ncenneri'?

M' 'a chiamme paura!

E nun è bello pure vestirs' 'e stu calore

E addeventa' 'o calore stesso ca te spoglia

P'abballa' sott' 'a 'na trav' 'e fuoco?

Sapite che vve dico?

'Sta scarpa ca s'è perza stanotte è 'a fortuna nosta!

È sempe 'na femmena ca l'ha perza

E si 'o rre ha scatenato l'inferno

Vo' dicere ca senz' 'e essa nun po' sta'

E chi è essa?

Sempe 'na femmena!

Una 'e nuie ca se pò mettere sott' 'e piere 'o rre

E addeventa' 'a riggina 'e stu popolo! -

Oi, sole, sole

Jesce a 'stu paese!

Jesce a 'stu paese!

Addo' chi te vo' bbene more acciso

Bbene more acciso!

• Artist:Nuova Compagnia di Canto Popolare
• Album:La gatta Cenerentola (1976)