.. Psalm 10 lyrics

א למה ה' תעמד ברחוק תעלים לעתות בצרה.

ב בגאות רשׁע ידלק עני יתפשׂו במזמות זו חשׁבו.

ג כי הלל רשׁע על תאות נפשׁו ובצע ברך נאץ יהוה.

ד רשׁע כגבה אפו בל ידרשׁ אין אלהים כל מזמותיו.

ה יחילו דרכו בכל עת מרום משׁפטיך מנגדו כל צורריו יפיח בהם.

ו אמר בלבו בל אמוט לדר ודר אשׁר לא ברע.

ז אלה פיהו מלא ומרמות ותך תחת לשׁונו עמל ואון.

ח ישׁב במארב חצרים במסתרים יהרג נקי עיניו לחלכה יצפנו.

ט יארב במסתר כאריה בסכה יארב לחטוף עני יחטף עני במשׁכו ברשׁתו.

י ודכה (ידכה) ישׁח ונפל בעצומיו חלכאים (חל כאים).

יא אמר בלבו שׁכח אל הסתיר פניו בל ראה לנצח.

יב קומה ה' אל נשׂא ידך אל תשׁכח עניים (ענוים).

יג על מה נאץ רשׁע אלהים אמר בלבו לא תדרשׁ.

יד ראתה כי אתה עמל וכעס תביט לתת בידך עליך יעזב חלכה יתום אתה היית עוזר.

טו שׁבר זרוע רשׁע ורע תדרושׁ רשׁעו בל תמצא.

טז ה' מלך עולם ועד אבדו גוים מארצו.

יז תאות ענוים שׁמעת יהוה; תכין לבם, תקשׁיב אזנך.

יח לשׁפט יתום ודך בל יוסיף עוד לערץ אנושׁ מן-הארץ.

• Artist:King David