Sas mamas de Orune lyrics
Sas mamas de Orune lyrics
Sas mamas de Orune sun in dolu
pranghen sos fizos chin su coro afflitu
addoloridas chentza aer cunsolu,
o destinu crudele e maleditu.
Sos ànzelos de chelu benzan a bolu
annúntzien finidu donzi cunflitu.
Torra a cantare alligru o rusignolu
porta bonas novellas dae su lithu.
Funtanas e nuraches de granitu
su Tempiesu, Unérthole ‘e Marreri
pro totus, paesanos o foristeris
locos d’incantu in s’istajone bella.
Zòvanas mamas chin zòvanos fizos
partoridos chin penas e dolores,
dàzeli a issos tèneros cussizos
preicade sa pache e i’s’amore.
Mai prus venditta e rancore
mai prus mamas chin tristura in chizos.
‘Onzi fizu diventet su frore
comente at donzi mama sos disizos.
Funtanas e nuraches de granitu
su Tempiesu, Unérthole ‘e Marreri
pro totus, paesanos o foristeris
locos d’incantu in s’istajone bella.
Mamas chin sa bellesa isfrorida
chentza tenner un’ora de recreu
semper pessande a sa pache perdida
nande, precande a Santos e a Deus:
Ti preco, azuda a su paese intregu
chi sa gherra la facan pro sa vida.
Ti preco, cando torrat fizu meu
mi neret «Mama, sa gherra est finida».
Funtanas e nuraches de granitu
su Tempiesu, Unérthole ‘e Marreri
pro totus, paesanos o foristeris
locos d’incantu in s’istajone bella.
- Artist:Lucianu Pígliaru
- Album:Istentales (1995)