سازی ناساز [Sazi Nasaz] [Transliteration]

بولبولی باڵ شکاوی وه‌ختی گوڵم

هه‌ر شه‌پۆڵان ده‌دا دڵی له‌ کوڵم

موغی بێ ئاگری شه‌وی یه‌ڵدام

چاوڕێی چاره‌نووسی ناپه‌یدام

که‌وی بێ ده‌نگی نه‌و به‌هارانم

گوڵی بێڕه‌نگی چاو له‌ بارانم

کونجی جێ ژوانی چۆل و خامۆشم

سێبه‌ری نازه‌نینی ڕه‌شپۆشم

کێلی گۆڕی شه‌هیدی گومناوم

تاکه‌ داری کڕووزی بێ ئاوم

ده‌فته‌ری شیعری شاعیری ڕووتم

شه‌می سه‌ر گۆڕ و داری تابووتم

کونی گیراوی کۆنه‌ شمشاڵم

خه‌ونی ئاڵۆز و خاتیره‌ی تاڵم

چڵه‌ ڕێحانی دووره‌ دێراوم

سازی ناسازی هه‌ڵپه‌سێراوم

تکه‌ ئاونگی سه‌ر گه‌ڵای زه‌ردم

خه‌سته‌ و ده‌رده‌داری چی ده‌ردم

ئاخرین تیشکی خۆری پاییزم

شاعیری پیری تووڕه‌ و زیزم

چۆن ده‌توانم به‌ تۆ بڵێم من چیم ؟

خۆم گومانم هه‌یه‌ که‌ هه‌م یا نیم

• Artist:Maryam Ebrahimpour