Semplicità [Italian translation]

Te vòglio cómme si': spettenatèlla:

stu riccio crapicciuso e 'mpertinènte;

sti capille accussi bùccole e anèlla,

sènza ferriétte e sènza abbellimènte;

nè niro all'uócchie, nè pittura ô musso:

senza cipria pe ffaccia e sènza russo;

cu stu scialle granato ‘ncòpp' ê spalle

c'o pizzo aggraffatiéllo 'int'a nu fianco,

e stu piétto ca vótta 'a sótto 'o scialle

e fa vedé nu pòco 'e ròsa e gghianco.

Cu sta taglia aggarbata e assanguatèlla

nun 'o ssaje manco tu quanto si' bèlla.

Te vòglio cómme si': ca i' nun me sbaglio

quanno dico ca si' na maraviglia:

sènza n'aniéllo, senza nu sciucquaglio,

sènza niévo a ppusticcio e mantechiglia:

sémplice e schiétta, sprìceta e carnale,

carne sincèra e ténta naturale.

• Artist:Eduardo Nicolardi
• Album:Le videopoesie di Gianni Caputo