Sersal lyrics

Sersal li nav Kurda j’ezel

Bûye cejn û şahî ligel

Roj, sêzdehê rêbendanê

Li bin berfê, bin baranê

Piştî nîvro, danê esir

Sersal despê dike b’esil

Zar digerin li nav taxan

Pîroz dikin sersala wan

Devê derê nûzewicî

Heta derê pîra birçî

Li temen, rewşê napirsin

Ji nedanê jî natirsin

Bi awazek xweş û şîrîn

Hemî pev re dikin qêrîn

Serê salê, binê salê

Xwedê lawek bidê malê.

Nûzewicî, pîra birçî

Şekir, mewîj didin sebî

Sebî kêfxweş, pîrê dilgeş

Dibe êvar tarî û reş

Ji nû şahî destpê dike

Bi dîlan û bi qirdik e

Xortên mezin, ên bê simbêl

Tevdigerin wa pêl bi pêl

Bi sazbend û bi qirdik in

Bi govend û bi teplik in.

Qirdik yekî zana û jîr

Hema bêjin “Noel Bapîr

Rih û simbêl pê ve dikin

Riwê wî jî tenî dikin

Di dest de dar, simbêl û rî

Mîna kalek heftêsalî

Li pêş, qirdik, paş sazbend e

Koma xorta didin bende

Wî mal bi mal digerînin

Salek bi xêr dimizgînin

Sersala wan dikin pîroz

Hinek savar, dirav jî doz

Piştî şahî kuta dibe

Dahatin jî par ve dibe

Wekî bira, mîna hevpar

Par ve dikin dirav, savar

Daxwaziya min ji Yezdan

Tim şahî be li nav kurdan.

• Artist:Bro Omerî