Settèmbre [Italian translation]

Pe ll’aria ch’addóre suttile!

Só ‘e rròse? Só ‘e frutte ammature?

Settèmbre, ca pare n’Aprile,

schiuppà n’ata vòta fa ‘e sciure…

Nfrascà n’ata vota fa ‘a pianta,

cantà fa ll’auciélle nn’Ammóre.

Ne sóngo passate sissanta

Settèmbre pe dint’a stu còre!

Passaje chillo allèro, cunfrómme

fernètte ll’età spensierata.

(Settèmbre “secutapalómme”

pe dint’ê ciardine, â Nfrascata)

Po, chillo d’a primma fiurita,

d’e primme suspire d’o còre..

(Settèmbre, ‘o cchiù bèllo d’a vita,

ca fuje pure ‘o cchiù ngannatóre)

Po, chillo d’a primma amarézza

ca lassa avveluto e schiattuso…

Po, chillo che apprèzza e disprèzza..

quanno uno se fa maleziuso..

Po, chillo cchiù accòrto e pusato,

quann’uno se fa prufessóre,

quann’uno, si fa nu peccato,

nu ‘mpòrta : è peccato d’Ammóre…

Po, chillo ca ‘nnante a n’altare

te pòrta pe dìcere Si’.

Po, chillu Settèmbre ca pare

ca maje nun avéss’a fernì..

Po, chillo, chiammato, aspettato

cu ‘a vóce d’o primmo nguè—nguè..

Po, n’ato, po n’ato, po n’ato..

delizia e turmiénto pe me.

Po, chillo ca addòrme ‘e ricòrde..

po chillo ca ‘e tòrna a scetà..

e , ‘nfóse ‘a na làcrema, ‘e ccòrde

d’o còre fa ancòra tremmà..

Po chillo ca fuje nu capriccio,

na furia, na zèfera ‘e viénto..

po.. chillo.. ca chiòve.. unu piccio,

scucciuso.. cuntinuo e.. llènto!!

• Artist:Eduardo Nicolardi
• Album:Le videopoesie di Gianni Caputo