Sfrèggio lyrics

Ha tagliata la faccia a Peppenèlla

Gennareniéllo de la Sanità;

che rasulata! Mo la puverèlla,

mo pròprio è stata a farse mmedecà.

Po' l'hanno misa 'int'a na carruzzella,

è ghiuta a ll' Ispezzióne a ddichiarà;

e 'o dellicato, dòn Ciccio Pacèlla,

ll' ha ditto: “Iammo! Di’ la verità.

Ch'è stato, nu rasulo, nu curtiéllo?

Giura primma, llà sta nu crucefisso”

(e s' ha tuccato mpónt' a lu cappiéllo).

"Di’, nun t'ammenacciava spisso spisso?"

“Chi?" — ha rispuóst'essa. "Chi? Gennareniéllo!".

"No!... Ve giuro, signò! Nun è stat' isso!..."

• Artist:Salvatore Di Giacomo
• Album:Le videopoesie di Gianni Caputo