Signurenèlla [Italian translation]

Che ghiate a ffà a 'sta scòla ògne matina,

che ghiate a ffà a 'sta scòla d'o Giesù?

Vuje site accussì ghianca e accussì fina

ca ll'aria matutina

male ve fa’. Nun ghiate â scòla cchiù!

E quanno avite a ttaglio 'a signurina,

dicìtele ca nu giuvinòtto v'ha ditto, stammatina:

"Che ghiate a ffà a 'sta scòla d' 'o Giesù?"

Vuie site cómme a cchi, niénte penzanno,

cu ‘e stésse mane sóje, se ‘ntrézza ‘a sciòrta!

E i’ ve véco passà, sei mise a ll’anno,

tutte ‘e mmatine cu nu guardapòrta.

‘Nu guardapòrta c’a cartiéra ‘mmano,

che v’accumpagna sènza dì paròla…

Ma se férm‘a luntano,

quanno è ca vuje trasite dint’â scòla…

Guarda nu pòco… po… non ne po’ cchiù,

e se ne va chiagnénno e suspiranno:

«Ma ‘a pòzzo mannà sóla?»

Che ghiate a ffà…

che ghiate a ffà a ‘sta scòla d’o Giesù?

Avite ditte a 'na cumpagna vòsta

ca v'a spiato: "Papà tuo che fa?"

"Mio padre? Stà... impiegato sópra â Pòsta."

E nun avite ditto 'a verità...

E avite ditto pure na buscia,

dicènno l'indirizzo ô direttóre...

Gnorsì... Vuje state 'e casa a chélla via...

dint'a cchillu palazzo, sissignóre...

Ma ô quarto piano no... nu' state llà...

Vuie nun tenite stu...

superbo appartamento...

E si è pe' farve róssa ògne mumènto,

che ghiate a ffà...

che ghiate a ffà a 'sta scòla d' 'o Giesù?

• Artist:Rocco Galdieri
• Album:Collana letteraria Documenti.