Su patriotu sardu a sos feudatarios lyrics

Su primu chi si presentat

si nominat offissiale,

fathat bene o fathat male,

bastat non chirchet salariu:

procuradore o notariu,

o camareri o lacaju,

siat murru o siat baju

est bonu pro guvernare.

Bastat chi prestet sa manu

pro fagher crescher sa renta,

bastat chi fathat cuntenta

sa burscia de su segnore;

chi agiudet a su fattore

a crobare prontamente,

e si algunu est renitente

chi l'iscat esecutare.

A bortas, de podatariu,

guvernat su cappellanu

sas biddas cun una manu

cun s'atera sa dispensa.

Feudatariu, pensa

chi sos vassallos non tenes

solu pro crescher sos benes,

solu pro los iscorzare.

Su patrimoniu, sa vida,

pro difender su villanu

cun sas armas a sa manu

cheret ch'istet notte e die;

ja chi at a esser gasie,

proite tantu tributu?

Si non si nd'at a aer fruttu

est locura su pagare.

Si su barone non faghet

s'obbligassione sua,

vassallu, de parte tua

a nudda ses obbligadu;

sos deretos chi at crobadu

in tantos annos passados,

sun dinaris furados

e ti los depet torrare.

Sas rentas servin solu

pro mantenner cicisbeas,

pro carrozzas e livreas,

pro inutiles servissios,

pro alimentare vissios,

pro jogare a sa bassetta

e pro poder sa braghetta

foras de domo isfogare,

pro poder tenner piattos,

bindighi e binti in sa mesa,

pro chi pothat sa marchesa

sempere andare in portantina;

s'iscarpa istrinta, mischina,

la faghet andare a topu,

sas pedras punghen tropu

e non podet camminare.

Barones, sa tirannìa

procurade ‘e moderare.

• Artist:Tenores di Neoneli
• Album:Barones